28 de julio ~ 4 de augusto 2001

Interlingua in le centro

Thomas Breinstrup

Un anno con focalisation international a interlingua. Isto es le puncto de partita del 15e Conferentia International de Interlingua in Gdańsk, que elaborava le prime schizzo de un extense plano de labor, que ora es disveloppate per le consilio del Union Mundial pro Interlingua. Le plano debe poner interlingua in le centro public per numerose activitates e publicitate.

Al mesme tempore tote le organisation del UMI debera esser plus efficace, plus active e melio organisate. Isto ponera demandas ulterior al representantes e organisationes national de interlingua in tote le mundo. Illes debe ingagiar se sempre plus activemente in le labor. Un prime occasion es le Die Europee de Linguas le 26 de septembre, ubi linguas — al initiativa del Union Europee e del Consilio de Europa — essera celebrate.

Le vice-presidente de Gdańsk, Jan Stoppa, se faceva membro del UMI, quando ille le 29 de julio aperiva officialmente le 15e Conferentia International de Interlingua. Le vice-burgomaestro assi contribue al fundation de un organisation polonese de interlingua, que es actualmente sub preparation.

Le edition septembre—octobre del magazin Panorama essera totalmente dedicate al 15e Conferentia International de Interlingua in Gdańsk. Le magazin continera reportages, novas, notitias, nomines e multe photos del evento.

Le multe discursos presentate al conferentia in Gdańsk essera colligite e presentate electronicamente in iste pagina. Assi omnes, qui non participava in Gdańsk, pote totevia orientar se.

Ma anque le lectores del jornales ha essite ben informate del conferentia. Le pressas national in numerose paises ha essite amplemente informate super le conferentia in Gdańsk e ha anque publicate multe articulos super interlingua. Ja al prime die, le 28 de julio, le grande jornal finnese Helsingin Sanomat publicava un interview de un medie pagina con le presidente del Association Finlandese pro Interlingua, Allan Kiviaho. Le agentia polonese de novas, PAP, i.a. inviava un telegramma a omne su abonatos. Recentemente, le jornal regional Hallands Nyheter le 7 de augusto publicava un grande articulo super le conferentia e su resultatos.

Documentos e discursos

Miscellanea