Chepelare
Visita le pagina official del 19ne Conferentia International de Interlingua

Le excursiones durante le conferentia include:

1. Le pontes meraviliose

Le pontes meraviliose es un formation geologic natural in le montanias de Bulgaria de Sud. Vetule cavas ha essite subjugate a destruction per le aqua e solmente lor entratas e le galerias le plus grande ha essite conservate. Un loco inoblidabile, ubi le fortias e le beltate del natura pote esser admirate simultaneemente.

2. Le cavas

Le cavas in le region del citate de Smolyan es inter le cavas le plus grande e belle in le Peninsula Balkanic. Illos se ha formate al loco de vetule tubas vulcanic, ubi postea le aqua ha create sculpturas bellissime de petra, sal e glacia.

Le gurgite del diabolo

Adaptate pro touristas de cata etate. Il ha multissime scalas a montar per un enorme galeria subterranee, parallelmente con un cadita de aqua qui dispare sin tracias in le terra. Plure experimentos ha essite facite pro determinar ubi le aquas regania le superficie, ma in van. Nemo sape ubi va le aqua, disparente in le gurgite del diabolo...

Yagodina

Iste cava es de longe le plus pictoresc in le complexo. Le marcha in illo es facile, on non monta o descende, e le illumination artistic crea impressiones e imagines inoblidabile. In le cava il ha mesmo un officio de matrimonios del municipalitate local e le matrimonios ibi es multo popular.

Haramiiska dupka (le cava del banditos)

Isto es un cava difficile a acceder, ma le personas aventurose es benvenite a essayar lo. On necessita un forma physic vermente bon pro poter montar un muro de petra de quasi 20 metros e postea descender per filo in un galeria enorme. Le retorno verso le civilisation prende quasi duo horas de marcha. Non pro cata uno, ma un cosa que on face un vice in le vita.
(gruppo voluntari va esser formate al arrivata in le centro conferential, guidas professional del club local de speleologia)

Uhlovitsa

Le cava del sculpturas geologic. Iste cava es un del ultime tracias del glaciario qui coperiva Europa durante le ultime epocha glacial de 10 000 annos retro. Le glacia ha create tal figuras que il es difficile creder que isto es le natura e non un mano human qui ha laborate ibi. Le cava es a plure nivellos, on monta e descende plure scalas, ma le structura es satis bon pro esser visitate per touristas de varie etate.

Golubovitsa

Cava extreme con fluvio subterranee. Le infrastructura permitte visitatores qui non time le aqua.
(gruppo voluntari va esser formate al arrivata in le centro conferential, guidas professional del club local de speleologia)

3. Village de Smilyan

Iste village ha preservate multissime traditiones historic bulgare. Il ha certemente vetule casas del Renascentia bulgare, ma le plus interessante es le traditiones del cocina balkanic: on va visitar un manufactura traditional de caseo e on va mangiar in le restaurante traditional del manufactura.

4. Citate de Smolyan

Le citate de Smolyan es le centro administrative del region. On va visitar le ecclesia le plus grande in le region (al photo), le planetario e plure monumentos local. Tempore libere es previdite in le centro del citate.