Summario

De omne linguas que unquam obteneva plus que utilitate national on pote dicer que illos esseva portate trans lor confinios original per un expansive dynamismo cultural e utilitari. Illos fungeva como indispensabile utensiles cultural e utilitari. Le moderne internationalitate es largemente conditionate per le scientia e le technologia in le senso le plus comprehensive. Le lingua del scientia e del technologia es le moderne lingua international o interlingua. Illo non es, in senso stricte, un lingua complete sed es plus tosto un corpore multo comprehensive de terminos international que constitue le nucleo de un interlingua. Le lingua international ha absorbite material del plus variate origines sed su centro de gravitate es in le sphera del tradition grecolatin. Illo pote esser colligite intra le confinios de un gruppo homogenee de linguas fonte o linguas de controlo que non solmente representa le tradition grecolatin in nostre tempore sed que equalmente absorbeva omne significante parolas international radiate de altere centros. Iste gruppo es le gruppo anglo-romance de linguas con le germano e le russo como contribuentes potential.