[ACTUALISATE 2008-02-23] Le membros del Union Mundial pro Interlingua es invitate al urbe svedese Linköping in le fin de julio, ubi le quatro organisationes nordic de interlingua arrangia le 11-me incontro nordic de interlingua con tres dies con cursos intensive de interlingua.

Interessatos de interlingua se incontra pro usar le lingua e pro excambiar experientias con e bon ideas pro facer lo ancora plus cognoscite e usate in un bon collaboration a transverso del frontieras del paises nordic - Norvegia, Svedia, Finlandia, Danmark e Islanda.

Le loco conferential Valla Folkhögskola in Linköping, sudwest del capital Stockholm e con connexiones de avion directe de Copenhagen in Danmark e Stockholm, es le centro del incontro e del cursos mercuridi le 30 de julio usque dominica le 3 de augusto. Il habera duo cursos: un curso pro comenciantes e un curso de conversation pro illes, qui ja ha un poco de practica con interlingua. Le cursos intensive es gerite per professores experientiate in un atmosphera amusante e effective, a saper Ingvar Stenström al curso de comenciantes e Bengt Enqvist al curso de conversation. Ambes es professores gymnasial e ha inseniate interlingua durante multe annos.

Factos e precios

Valla Folkhögskola es le vicino al Universitate de Linköping (23.000 studiantes) e es situate proxime al centro del urbe. Linköping es le municipio le quinte plus grande de Svedia con circa 140.000 habitantes. Le urbe es situate in le centro del region Östergötland. Le aeroporto es in le urbe mesme, 3 km del Grande Mercato (Stora Torget), con connexiones directe a Stockholm e Copenhagen (Danmark). In ultra il ha bon connexiones ferroviari. In 1987, Linköping celebrava 700 annos de jubileo.

Lege plus:
• Linköping Kommune, www.linkoping.se
• Turistinformation om Östergötland, www.ostergotland.info
• Valla Folkhögskola, www.valla.fhsk.se
• Societate Svedese pro Interlingua, www.interlingua.nu

Quando le cursos fini venerdi a lunch, le incontro nordic comencia. Gratias al proxime connexiones e linguas multo similar, le paises nordic pote facilemente collaborar e per exemplo reusar materiales de un pais a un altere. Durante le incontro, le organisationes de interlingua in Danmark, Norvegia, Svedia e Finlandia vole crear inspiration e collaboration que debe crear plus de interesse pro interlingua e pro usar lo.

Ultra del discussiones super nove ideas, le incontro comprehende un parve excursion al vetule urbe de Linköping, intertenimento e sempre bon compania international.

"Omnes es benvenite al Cursos intensive e le 11-e Incontro nordic e extra-nordic in Linköping le 30 de julio al 3 de augusto. Schedas de inscription va esser publicate in un o duo dies. Le precio total con habitation e repastos es circa 2.600 coronas svedese pro un camera singule. Nos ha localisate iste incontro a Linköping pro facer lo multo facilemente accessibile: Avion ab Copenhagen e eventualmente in le estate directemente ab Amsterdam, apud le strata E4 e al ferrovia Malmö-Stockholm," dice Ingvar Stenström, secretario del Societate Svedese pro Interlingua (SSI), que es le arrangiator principal in collaboration con le Union Danese pro Interlingua, le Union Norvegian pro Interlingua e le Association Finlandese pro Interlingua.

Le incontros nordic ha essite arrangiate omne duo annos in annos par desde 1988, i.a. con le ex-presidente de Islanda, Vigdís Finnbogadóttir (hodie ambassator de linguas de UNESCO), como protector. Le incontros ha - malgrado essente nordic - habite visitas de plus que dece paises.

  

Le scheda de inscription se trova ci. - Annuncia tu desiro de participation ja hodie al Societate Svedese pro Interlingua