Le grande dictionario francese-interlingua con quasi 52.000 entratas non solmente existe in un version electronic ci in www.interlingua.com. On pote anque comprar lo como un libro sur papiro.

Le dictionario es le plus grande publicate usque hodie in francese, e illo anque es inter le plus grande dictionarios de interlingua del toto. Illo contine 325 paginas in formato A4 con texto in tres columnas. Illo va haber un copertura colorate e plastificate e un dorso anellate. Le precio es 30 euros plus le porto postal.

Piet Cleij, vice-secretario del Union Mundial pro Interlingua, es le autor del dictionario que esseva publicate in forma electronic in www.interlingua.com in le initio de junio. Con le adjuta de Alberto Mardegan, administrator del UMI, ille actualmente corrige un numero de incorrectiones causate per le conversion del base de datos al version electronic. Iste labor pote durar ancora alcun septimanas, e solmente quando toto ha essite controlate, le libro sur papiro essera publicate.

Interessatos pote ja ora reservar un exemplar per contactar Piet Cleij.