13tie incontro nordic de interlingua
Le costa west de Svedia es un idyllio, specialmente durante le estate. Billströmska Folkhögskolan (a sinistre) essera le centro conferential in julio 2012. Illo es bellemente situate proxime al mar (photo inferior). Photos: Billströmska Folkhögskolan

Ora on pote inscriber se pro le le 13tie incontro nordic de interlingua in un insula al nord de Göteborg in Svedia in julio - con tres cursos. Apporta tote le familia.

UMI  Le inscription comencia ora pro le 13tie incontro nordic de interlingua con tres cursos intensive le 25-29 de julio 2012 sur un belle insula in le costa west de Svedia.

Le scheda de inscription es preste, e le quatro organisationes de interlingua in Danmark, Norvegia, Svedia e Finlandia invita omnes - anque extra le paises nordic - a participar in le arrangiamento traditional estive que pro le prime vice habera loco sur un insula (con ponte) in un del locos le plus belle in Svedia.

Del 25 al 27 de julio il habera tres cursos: uno pro comenciantes, uno pro illes qui ja cognosce un poco de interlingua, e uno pro illes qui desira plus de eloquentia in conversation. Pois seque, del 27 al 29 de julio, le incontro nordic mesme. Le precio pro participar omne cinque dies es 300 euros per persona, inclusive pernoctation e omne repastos. Le precio es le mesme per persona pro un camera singule como pro un camera duple, ma pro esser secur que on habera le typo de camera que on desira, il es un bon idea inscriber se tosto.

Omne le detalios del arrangiamento plen de traditiones se trova in le scheda de inscription que debe esser imprimite sur papiro e expedite in un inveloppe al arrangiatores. Il ha anque informationes super qui contactar si on ha questiones.

Le arrangiatores spera vider multissime participantes ab tote le mundo e incoragia specialmente juvenes e familias a participar.

Lege multo plus super le incontro ci: Incontro nordic sur un belle insula in julio 2012.

Discarga ci le scheda de inscription pro le 13tie incontro nordic de interlingua (in formato PDF)