Hallo a tote le mundo: Films in interlingua!
24 personas da breve presentationes de interlingua in 12 linguas pro crear plus de interesse.
Benvenite a un nove section in www.interlingua.com con films in e super interlingua!
24 personas ab tote le mundo presenta cata uno in 40-60 secundas interlingua e su avantages in lor linguas materne. Isto es le initiativa le plus recente pro fortificar le presentation national de interlingua e assi attraher plus de interessatos e usatores a interlingua.
Le multe presentationes es in anglese, bulgaro, danese, espaniol, francese, germano, hungaro, interlingua (!), nederlandese, polonese, portugese e svedese. Tote le films esseva registrate durante le 19ne Conferentia International de Interlingua in Bulgaria in julio 2011. Un selection del participantes voluntarimente e spontaneemente explica proque illes trova interlingua si interessante e lo recommenda a alteres.
Sub cata film il ha ligamines a material informative super interlingua in cata lingua national. Assi interessatos pote immediatemente trovar plus de informationes.
Clicca sur le puncto Films in le menu a sinistre. Illo contine anque le nove film humoristic "Le clave perdite" e le film "Nulle calma in Kalmar" super le 12nde incontro nordic de interlingua in le urbe historic Kalmar in Svedia in julio 2012.
Plus de films in interlingua va esser producite e presentate in le section.