Chepelare
Visita le pagina official del 19ne Conferentia International de Interlingua

Le participantes in le 19ne Conferentia International de Interlingua pote gauder se a septe dies con multe projectos practic.

UMI  Le programma del 19ne Conferentia International de Interlingua in Bulgaria le 23-30 de julio 2011 dara opportunitates ric de usar interlingua in practica per collaboration super multissime projectos - sempre un grande desiro in le evalutation del conferentias.

Omne participantes recipe directemente le plen programma. On pote ancora inscriber se (vide ci: Scheda de inscription.)

Ecce un summario del contento del septimana:

Sabbato, le 23 de julio: Le participantes arriva, se cognosce e se prepara. In le vespere il habera un presentation de omne le paises del participantes.

Dominica, le 24 de julio: Omne le matinos comencia per jogging voluntari. Post le jentaculo, le presidente del UMI, Sven Frank, e le secretario general del UMI, Carlos Soreto, aperi officialmente le conferentia. Pois illes presenta lor reporto super le activitates de interlingua in le mundo, ante que le cursos - un curso pro comenciantes e un curso de conversation - comencia; le cursos durara tote le septimana in le antemeridies, e durante que le curso de comenciantes se concentra super apprender e usar ben le lingua, le curso de conversation deveni poco a poco un curso de labor practic. In le postmeridie, on introduce como registrar audio e video, e durante iste postmeridie - e le resto del septimana - le participantes va registrar e rediger interviews, presentationes e multo plus pro Radio Interlingua e pro parve films in interlingua.

Lunedi, le 25 de julio: Le cursos continua, e in le curso de conversation on va laborar concretemente con traduction de paginas touristic in Internet. In le postmeridie il habera le traditional "photo official" del participantes, ante que le prime excursion comencia. (Vide le programma de excursiones.) Como sempre, le vesperes es a disposition pro reposar, cantar, dansar - o forsan registrar un disco CD con cantos, un interview o ancora un scena pro un film.

Martedi, le 26 de julio: Jogging voluntari in le matino ante le jentaculo. Pois le cursos continua, ubi on i.a. discute como facer le conferentia un magnete. In le postmeridie il habera activitates public.

Mercuridi, le 27 de julio: Jogging voluntari. Cursos, ubi on va discuter resolutiones del conferentia - e naturalmente apprender e usar interlingua. Post le lunch veni le secunde excursion. (Vide le programma de excursiones.)

Jovedi, le 28 de julio: Jogging voluntari. Cursos, ubi le labor con traductiones, films etc. continua con plen energia. In le postmeridie, on va discuter instrumentos digital pro promover interlingua e le developpamento continue de www.interlingua.com pro facer lo sempre plus attractive e comprehensive.

Venerdi, le 29 de julio: Jogging voluntari. Le cursos fini per examines voluntari sur nivello A1 e A2. (Lege plus ci.) In le postmeridie, le labores con projectos continua. In le vespere - le ultime del conferentia - il ha tempore de festivitate, como isto ha devenite le tradition.

Sabbato, le 30 de julio: Le die de partita! Ma non sin jogging voluntari. Post le jentaculo veni le ultime session e assi le ultime chance pro acclarar e finalisar cargas e punctos del conferentia. Pois seque un evalutation commun: que esseva bon o minus bon - e como pote illo devenir plus bon in 2013? Alora le conferentia essera officialmente claudite per le presidente del UMI e le secretario general del UMI, ante que on dice adeo e retorna a omne partes del mundo.