le 23e conferentia international de interlinguaMadeleine Mahé, presidente del Union Mundial pro Interlingua (UMI)
Apertura official del 23e conferentia international de interlingua.
Praga, Tchechia, lunedi le 23 de septembre 2019, 9.00 horas.

Benvenite al conferentia in Praga.

Pro comenciar, io vole regratiar le arrantiatores de Praga, qui nos permitte de esser in iste bellissime citate.

Pro le veteranos, isto es le secunde vice (le prime vice esseva ... in le seculo passate). Pro le alteres, qual chance de discoperir Praga. Pro le comenciantes, qual chance de discoperir Interlingua.

E il ha mesmo personas qui ha le duple chance: discoperir Praga e discoperir Interlingua.

Le scopo de un conferentia es de mitter in commun nostre ideas, experientias. In iste conferentia, le accento essera ponite sur le nove medios de communication: Facebook, WhatsApp etc., sur le nove manieras de cercar informationes sur Internet – Wikipedia per exemplo.

Nos debe sasir iste chance, iste opportunitate de attinger le plus grande numero de personas possibile, in tote le mundo.

Un altere scopo del conferentia es practicar Interlingua. Tote le die: Leger, audir, scriber, durante cursos e sessiones, e durante le nocte soniar in Interlingua – e in le matino pensar in Interlingua... E naturalmente parlar in Interlingua.

Le conferentia es le momento ideal pro parlar inter nos.

Parla con le adjuta de vostre dictionario o – plus bon – con le adjuta del alteres. Vostre questiones le plus frequente pote esser “Ma como on dice..?” o “Io non sape iste parola. Io cerca un parola...”.

Al fin del septimana, vos essera surprendite per vostre progressos.

Pro finir, ancora gratias al arrangiatores de Praga e a tote le personas qui ha organisate iste conferentia.

Bon sojorno a omnes e bon conferentia!