Wilhelm Bladin

Svedia
Nascite: 24 de novembre 1884
Morite: 16 de septembre 1968

Le secunde secretario national del Union Mundial pro Interlingua pro Svedia esseva Wilhelm Bladin, Malmö, vastemente cognite como pedagogo progressive e autor de grammaticas, manuales e dictionarios pro le linguas que ille inseniava: anglese, germano e francese.

Ille nasceva in Gävle e deveniva fil. kand. 1905 in anglese, germano e francese, fil.lic. in 1908 e fil.dr. 1911 in anglese e postea fil.lic. in francese. Desde 1912 ille esseva professor gymnasial "lektor" in Härnösand e desde 1916 in Malmö. Dr. Bladin esseva previemente un adherente de Latino sine Flexione. Ille dirigeva le prime curso de francese in le radio svedese 1928-1933, essente etiam un pionero del radio quando illo esseva un invention nove.

Wilhelm Bladin esseva durante un periodo le representante svedese del Union Mundial pro Interlingua.

Con John Nordin e fil. mag. Erik Berggren, Wilhelm Bladin colligeva circa 14.000 parolas pro un dictionario svedese-interlingua, que appareva in forma mimeographate in le estate de 1964.

Bladin etiam fundava un schola secundari superior, Privata elementarläroverket, que ancora existe e comprehende schola fundamental e gymnasio nunc sub le nomine Bladins skola. Le schola es un del plus veteres in Svedia e comenciava in le fin del annos 1800 como un schola elementar. Wilhelm Bladin dava al schola su nomine e esseva le rector la usque al annos 1950s.

Wilhelm Bladin publicava plure libros: "Rätt grund i engelska" (Stockholm, 1951), "Student- och realskoleskrivningar i tyska och engelska" (Uppsala, 1916), "Svensk-engelsk grammatisk ordbok" (Stockholm, 1914), "Nyckel till student- och realskoleskrivningar i tyska och engelska" (Uppsala, 1916), "Tysk läsebok" (con Axel Wahlgren, Malmö, 1922), "Privatlektioner i engelska" (Malmö, 1922) e "Lärobok i engelska" (Malmö, 1922).

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua