Johanna Adriana Goudkuil-de Visser

Nederland
Nascite: (non cognite)- le 10 de septembre 1991

Post longe maladia, Jo Goudkuil, Beekbergen, Nederland, moriva in 1991 al etate de 65 annos.

Johanna Adriana Goudkuil-de Visser esseva pro omnes, qui habeva le fortuna de cognoscer la, sempre le car e energic sposa amabile de Frits Goudkuil, le gerente del Servicio de Libros, e le hospitessa perfecte al multe personas, qui visitava lor domo paradisiac in Beekbergen, ubi es anque situate le imprimeria.

Jo Goudkuil esseva le forte supporto de su sposo in omne questiones, e illa esseva le infatigabile arrangiatrice practic del affaires quotidian. Illa habeva un talento de organisar, tanto quando le coffros debeva esser paccate pro le conferentias como quando le expositiones de libros debeva esser presentate.

Jo Goudkuil solmente participava in le conferentias de interlingua in 1985 e 1989, proque illa non amava multo esser in grande citates. Illa prefereva le idyllio rural charmante, in le qual illa habitava con su sposo.

E la, illa recipeva con le calide hospitalitate e cordialitate que illa sempre habeva, quando le Conferentia International de Interlingua in Zwolle, 1989, visitava le imprimeria del Servicio de Libros.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua