 |
|||||||||||||||||||||||||||||||||||||||||||||||||||||||||||||||||||||||||||||||
 |
|||||||||||||||||||||||||||||||||||||||||||||||||||||||||||||||||||||||||||||||
 |
|||||||||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||||||||
|
|
 Ingemar GullstrandSvedia Ingeniero e professor retirate de chimia, Ingemar Gullstrand, Landskrona, habeva troppo de energia pro reposar post esser pensionate e deveniva in 1988 le tresorero del Societate Svedese pro Interlingua e distributor central del Panorama e del magazin scandinave Actualitates in Svedia e Norvegia dece vices per anno. Ingemar Gullstrand esseva ingagiate in altere movimentos idealistic, Amnestia International e Federalismo Mundial. Durante le ultime annos su sposa Marianne, membro del SSI, esseva multo malade de un apoplexia usque a su morte in le primavera de 1991, e Ingemar Gullstrand debeva assister la die e nocte, lo que ille faceva con amor e dedication emovente. Que su fortias esseva considerabile on poteva divinar vidente su corpore impressionante per su formato, un corpore que esseva tres vices plus vetere que su spirito. (Un vice ille ha proponite in le consilio del Societate Svedese pro Interlingua que le importantia del votos debe esser considerate secundo le peso del proponitor... sed alteremente ille esseva un bon democrate.) Durante le ultime annos, ille plangeva que ille audiva mal. E, como tresorero, quando on le diceva "Paga iste factura a Sr. A,'' ille vermente non audiva ben, sed quando on diceva "Quatro nove membros vole pagar lor quotisationes al Societate Svedese pro Interlingua,'' ille sempre audiva benissimo... Su enthusiasmo pro interlingua esseva grande. Ille esseva un eminente organisator e assi esseva le architecto practic detra le prime Incontro Scandinave de Interlingua in Lund in 1988 - le fundamento del incontros scandinave, ora nordic, que ha devenite un tradition biennal. Ille participava pro isto in omne le incontros scandinave de interlingua e in le conferentias international. Omnes appreciava su amabilitate sin fin, su gentilessa e humor quiete. Ingemar Gullstrand poteva parer quiete e passive, ma ille sequeva toto, e ille gaudeva specialmente multo, quando on parlava, cantava o interteneva in interlingua. Su 75-te anniversario esseva celebrate al Conferentia International de Interlingua in Helsingborg, Svedia, un septimana ante festum. Su dedication al labor pro interlingua esseva total. Quando, in 1992, ille voleva limitar su ingagiamento pro su multe diverse organisationes idealistic, ille declarava que ille voleva concentrar su fortias sur SSI: "Interlingua me da le plus grande satisfaction, e pro interlingua io vole laborar le resto de mi vita - e un poco plus," ille jocava. Ille habitava 50 annos con su sposa Marianne in su casa a Saxtorpsvägen 115 in Landskrona, que ille voleva transformar in un "gästhem" - un casa de hospite pro interlinguistas. Le 12 de novembre 1993 ille moriva post alcun septimanas de maladia causate per un infarcto cardiac. Ille esseva ancora hospitalisate. Pulmonitis le toccava, pois le renes non functionava ben, e al fin le corde non voleva plus. Ille moriva tranquillemente in le matino. Revidite: 2006-12-29 |
|
|
|||||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||||||||
| |
|||||||||||||||||||||||||||||||||||||||||||||||||||||||||||||||||||||||||||||||
Redaction:
Th. Breinstrup, Ingvar Stenström e Jesper Olsson |
|||||||||||||||||||||||||||||||||||||||||||||||||||||||||||||||||||||||||||||||
