Pencho Hadjigenchev

Bulgaria
Nascite: 5 de maio 1915

Le Union Mundial pro Interlingua diceva benvenite a Bulgaria in le rangos de representantes official de interlingua in 1993, quando Pencho Hajigenchev, alora 77 annos, esseva appunctate le representante pro Bulgaria.

Bulgaria esseva durante multe annos un "puncto blanc" sur le mappa de interlingua, ma Pencho Hadjigenchev cambiava le situation. 

Ille graduava del Collegio American in le capital bulgare, Sofija, e le Schola Superior de Economia in Varna. Durante 35 annos ille laborava como commisso de banca, de illos 30 annos in le quartiero general del Banca National Bulgare e le Banca Bulgare de Commercio Estranier, ambes in Sofija. Assi un economo ille se interessava totevia multo pro philologia e ha studiate durante octo annos anglese e germano e ha cognoscentia a francese e latino. Pencho Hajigenchev ha traducite plure articulos e mesmo alcun libros ab e a anglese e germano.

Multe initiativas preciose esseva prendite pro preparar materiales basic pro apprender interlingua e assi assecurar le crescente interesse pro le lingua in le pais est-europee. In 1994 appareva su "Kratâk bâlgaro-interlingviski rechnik" (Parve dictionario bulgaro-interlingua), in 1995 (con Vasela Dimitrova) "Kratâk interlingvo-bâlgarski rechnik" (Parve dictionario interlingua-bulgaro) e "Nastavki predstavski na interlingva (Suffixos e prefixos de interlingua). In 1994, ille in ultra traduceva e adaptava le "Gramatika na Interlingua" (Grammatica de Interlingua) per Karel Wilgenhof, originalmente elaborate in interlingua.

Pencho Hadjigenchev passava le representation de interlingua pro Bulgaria in 1996 al vice-rector del Universitate de Sofija, Ekaterina Draganova, que ille mesme trovava pro le posto.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua