Jan Persijn

Nederland
Nascite: 11 de januario 1926
Morite: 12 de decembre 2016

Al conferentia international de interlingua in Praga in 1995, un juvene tcheco con multe bagage se adressava a un senior passante in le vestibulo del edificio conferential. Le tcheco le demandava in mal anglese, si ille poteva conducer le al autobus. Le senior passante esseva occupate e declinava. Alora le studente demandava pro un altere visitator, lo que in mal anglese deveniva: "Is there another ghost?" (Ha il un altere spectro?)

Desde alora Jan Persijn sempre ha essite mentionate in circulos de interlingua como "Mr. Ghost". Plus tosto, ille debeva esser Senior Musica (o Jan Einstein, como su amicos le appella). Nam su talento musical con specialmente le harmonica a bucca es exceptional, e ille ha presentate su talento durante un serie de conferentias, accompaniate per un orchestra transportabile – i.e. a un cassetta.

Jan Machiel Persijn nasceva in Leeuwarden le 11 de januario 1926.

In le estate calide de 1947 Jan, qui studiava chimia al Universitate Technic de Delft, incontrava su sposa futur, Franske, qui laborava al bibliotheca in Sneek, ubi Jan durante le estate habitava con su parentes. A causa del temperaturas altissime, ille non poteva studiar in casa e memorava le camera de studios al bibliotheca. La ille videva un puera bellette in un roba jalne e con un nigre banda villute in le capillos – le initio de plus que 50 annos de relationes e, como un miraculo, non le fin del studios universitate.

Franske e Jan Persijn se maritava in 1951 un mense post que Jan comenciava laborar in un firma chimic in Rotterdam. Le prime filia nasceva un mense ante le inundation terribile in le sudwest de Nederland in 1953. Ancora duo filias nasceva, e octo annos post le ultime puera veniva – al surprisa del copula – un filio. Franske Persijn remaneva in casa, durante que le infantes esseva parve.

In 1965 Jan Persijn acceptava un empleo in un compania de papiro. Ille gereva un parve gruppo de specialistas, deveniva chef del division technic e, in fin, chef del laboratorio de recercas e developpamento. Al etate de 54 annos, ille perdeva su empleo in 1980, e le firma esseva bancarupte. Ille comenciava su proprie firma, un parve compania que durava 12 annos, e que exportava a multe altere paises. Franske Jorrisma-Persijn esseva importante; illa esseva responsabile del administration total e imballava omne le merces. In 1992 illes vendeva le firma e se retirava; le firma simplemente cresceva troppo rapidemente. 

In vice, Jan Persijn tractava su harmonica chromatic in combination con computator e claviatura electronic e construeva un tote studio in le casa in Wenum. Le copula ha numerose vices intertenite al conferentias de interlingua – con musica e con recitationes. Omnes appreciava lor talentos e lor bon humor.

Jan Persijn moriva in Apeldoorn le 12 de decembre 2016.

Redaction: Th. Breinstrup, Ingvar Stenström e Jesper Olsson
Copyright © 2001-2021 Union Mundial pro Interlingua