Jean Armel Pierre Mahé

Francia
Nascite: le 23 de februario 1916
Morite: le 3 de septembre 2001

Le patrono del active familia interlinguista francese Potet-Mahé, Jean Armel Pierre Mahé, nasceva in le departimento del Finisterra, region Brittany in Francia, parlante breton (quasi) ab su die natal. A iste data un de su avunculos esseva occidite al battalia de Verdun, e sex menses postea moriva su patre de un maladia prendite sur su nave de guerra.

Al schola, in 1922, Jean Mahé apprendeva francese sin comprender le signification del parolas. Ille esseva interessate per litteras, iste designos que formava parolas: papa, maman (patre, matre; in breton: tad, mamm). Pro ille le schola esseva un loco de spectaculo. Nulle cinema a iste epocha, ni electricitate. Il habeva sex institutores in le schola; duo inter illes puniva le infantes, qui parlava breton.

Sex annos durava le schola primari; pois Jean Mahé habeva quatro annos al collegio e tres al schola normal del institutores. Postea ille ha mesme inseniate in le scholas primari usque su retiramento.

Jean Mahé, qui habitava usque a su morte in La Ferté Saint-Aubin, cognosceva interlingua per le intermedio de Jacques Roux, futur autor del dictionario francese-interlingua. Le classe de Roux correspondeva con le classe de Jean Mahé, e Jacques Roux adjungeva un pagina in interlingua al fin de su jornal scholar.

Durante multe annos Jean Mahé esseva le tresorero del Union Interlinguiste de France.

In 1981 Jean Mahé participava al 6-te Conferentia International de Interlingua in Sheffield, Grande Britannia. Su filia, Madeleine, le conduceva in caravana. Su granfilia Gaëlle de alora novem annos les accompaniava e (se) amusava (con) le participantes.

Un del participantes, Walter Knight Sturges, americano e sposo de Alice Sturges (filia de Dave Hennen e Alice V. Morris, fundatores del International Auxiliary Language Association, cuje recercas duceva al elaboration scientific de un lingua international facile a comprender), cognosceva un poco de francese e se rememorava del fabula de La Fontaine "Le Corvo e le Vulpe". Le duo recitava le fabula in commun.

Al retorno in Francia, Gaëlle Potet informava super interlingua e in 1983 su matre, Alix, e su soror, Frédérique, veniva al 7-me conferentia de interlingua in Taastrup, Danmark. Desde alora le duo filias e duo granfilias de Jean Mahé ha participate in commun in le majoritate del conferentias sequente, usque a recentemente con le patrono a lor latere.

"Io non vade plus con illas; le viages me fatiga. Ma io guarda un excellente memoria del reuniones international," Jean Mahé diceva recentemente. Como le reuniones international guardava sempre un excellente memoria de ille – e sempre le inviava un grande carta con salutes ab omne participantes.

Jean "papa" Mahé collaborava in le elaboration del version francese del curso "Interlingua – instrumento moderne pro communication international" per Ingvar Stenström (1988).

Ille ha essite characterisate como un homine que on non jammais audiva dicer un parola negative, ni de un persona, ni del circumstantias. Non mesmo quando ille narrava del persecutiones que ille debeva suffrer como parve puero breton, quando ille parlava su lingua materne, le breton, in le schola. Sempre Jean Mahé habeva un attitude positive e un bon humor. E ille ganiava per su presentia al conferentias le cordes de omnes como un persona charmante, affabile e sympathic.

Jean Mahé moriva lunedi le 3 de septembre, 84 annos de etate. Durante un promenada ille habeva un infarcto e moriva subitemente. Secundo su voluntate ille esseva incinerate al crematorio de Orléans.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua