Jørgen Kofod-Jensen

Danmark
Nascite: 30 de octobre 1923
Morite: 13 de decembre 2004

In Danmark, le etate de esser pensionate es a 67 annos. E Jørgen Kofod-Jensen probabilemente esseva pensionate de su labor como ingeniero civil in le provision de aqua in Copenhagen, ma isto le faceva  presidente de plen tempore in le Union Danese pro Interlingua (DIU).

Jørgen Kofod-Jensen nasceva in 1923 i Copenhagen Valby. In 1942 ille deveniva stud. mat. nat. ab le Metropolitanskolen e in 1958 cand. polyt. (ingeniero de construction). Durante le tempore de studios, ab 1943, ille esseva assistente de officio e designator. In 1960-1990 ille esseva ingeniero civil al Provision de Aqua de Copenhagen.

Ille sequeva cursos de espaniol e esperanto e post isto cursos semiannual in linguas e altere themas al scholas vesperal.

Jørgen Kofod-Jensen esseva un del pioneros danese – si non le prime – de interlingua. Su prime incontro con interlingua esseva le 22 de maio 1952, quando ille iva con un altere danese cognoscitor de linguas, Arne Hamburger, plus tarde amanuensis al Consilio del Lingua Danese, a un incontro sur Grønnevej in Virum. Ci le occidentalistas danese decideva ir a interlingua. Al fundation del DIU in 1960 ille deveniva consiliero e desde 1963 le secretario natural. Desde 1985 ille ha essite le presidente e in ultra le redactor del periodico Actualitates que sub su redactorato desde 1972 ha ite ab esser purmente danese a devenir primo scandinave e pois nordic con le inclusion in 1998 del organisation-soror in Finlandia. Un cadita totevia le impediva facer su labor, como ille voleva, e le edition de januario-martio 2001 assi deveniva le prime sub le nove redactor, Erik Enfors, de Svedia.

Nemo poteva como Jørgen Kofod-Jensen "planger" de facultates mancante de poter scriber isto o illo. Totevia, ille reageva promptemente, quando le occasion se presentava, e scribeva litteras al jornales – danese o estranier. Su prime littera al jornales ille scribeva in 1943. Ille assi possede le record mundial de publicar litteras super interlingua in jornales e magazines. Nulle occasion debeva esser non probate. Melior un littera troppo multo que un littera troppo poco.

Desde 1993, ille esseva  le redactor energic del "Cantario de Interlingua" que appare in un nove version cata anno pro le conferentias international e nordic. Ma ja al initio in ca. 1987 ille demonstrava su facultates impressionante de torquer un texto e facer lo belle poesia in interlingua – sequente exactemente le notas musical. E mesmo si Jørgen Kofod-Jensen a un occasion ha mentionate que ille non esseva troppo musical, isto es modestia. Le inspiration e talento obviemente veniva ab su sposa, Karen, qui canta bellemente in maniera professional. Le copula celebrava lor 25-nte anniversario de maritage le 7 de julio 1998.

Jørgen Kofod-Jensen moriva le 13 de decembre 2004 post maladia durante tempore plus longe.

Redaction: Th. Breinstrup, Ingvar Stenström e Jesper Olsson
Copyright © 2001-2010 Union Mundial pro Interlingua