Toma Macovei

Romania
Nascite: le 23 de julio 1911
Morite: le 25 de april 2003

Professor Toma Macovei, nascite in Ghergheasa e habitante in Mizil, ha essite ab initio durante 14 annos officiero active in le armea. Ille ha luctate durante le guerra contra le fascismo pro le liberation de Romania, ha essite ferite e decorate con le ordine "Le stella de Romania in le grado de cavallero". Parallelmente, ille ha sequite cursos universitari. Como sublocotenente ille ha initiate e conducite un modeste revista litterari, ha publicate alcun articulos in le pressa central e su prime opusculo "Le vita anecdotic del militar". Post le guerra, essente licentiato in philosophia e absolvento del Seminario pedagogic universitari in philosophia e derecto, ille exiva del armea e comenciava como professor de philosophia e linguas, ora retirate.

Toma Macovei apprendeva de interlingua in 1982 e ha desde 1984 essite un diligente contributor al periodicos in interlingua. Su articulos - sovente super themas litterari e belletristic - ha apparite in le periodicos Currero, Heraldo de Interlingua e Panorama. In 1988 ille editava su prime libro in interlingua, "Le Vita Anecdotic del Homines Illustre", in 1991 su secunde "Ab le auro spiritual del scena e del schermo", in 1995 "Joieles spiritual" e in 1996 "Miscellanea, insolite creationes spiritual". Le manuscripto a al minus dece altere libros es preste e attende le publication. Su libros contine sempre lectura amusante pro inricchir le litteratura humoristic de interlingua. Illos misce factos informative con anecdotas e datos biographic, presentate in un stilo capturante. Un libro futur assi essera intitulate "Interlingua – mi amor".

Scriber es le grande passion de Toma Macovei, ma ille anque ha habite tempore pro ager como representante inofficial de interlingua in Romania, forniente al interessatos material informative super le lingua, usque al fundation del Association Romanian pro Interlingua in 2000.

"Justo ora io me trova in un periodo de intense labor creative," sonava le message ab Mizil, ubi ille habita, ante 85-nte anniversario in 1996.

Malgrado su etate minus juvene Toma Macovei faceva le longe viage in 1991 a su prime conferentia international de interlingua in Helsingborg, Svedia, ubi ille capturava le cordes de omnes pro su energia, su sempre bon humor e su facultates extraordinari como orator e scriptor. Pois ille ha assistite a plure altere conferentias, e su memorias ab illos anque es parte de un manuscripto.

In le annos 1999-2000, ille ha ponite omne su fortias in le enorme "Dictionario encyclopedic de interlingua", un libro gigantic que ora cerca su redactor, durante que on considera vias pro transferer su multissime paginas, scribite per machina a scriber, al mundo digital.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua