Ladislav Podmele

Republica Tchec
Nascite: le 11 de junio 1920
Morite: le 30 de april 2000

Ladislav Podmele esseva sub su pseudonymo litterari, Jirí Karen, cognoscite in grande partes de su pais natal e haberea habite 80 annos le 11 de junio 2000. Ma ille moriva le 30 de april 2000.

Ladislav Podmele nasceva in 1920 in le urbe Litomýsl, ubi nasceva anque le compositor Bedrich Smetana. Ille practicava le mestiero de librero, e in le etate de 20 annos ille comenciava studiar in le gymnasio in le urbe Hradec Králové in Bohemia.

Le studios esseva interrumpite per le Secunde Guerra Mundial, e Ladislav Podmele esseva fortiate a laborar in Germania. Post finir le studios de historia e philosophia al facultate philosophic de Carolo in Praga, ille esseva active como professor de gymnasio e le schola professional in Ustí nad Labem e in Kladno. Desde 1954 ille laborava in le instituto pro inseniar le inseniantes (methodica) e depost 1961 in le instituto explorative in Praga.

Post quatro infarctos (morbo del corde) ille habeva finite labores professional e dedicate su energia a crear e publicar libros de poesia. Inter su publicationes esseva Momentos opportun pro devenir matur (1972). Le lapide volante como ave (1973). Parapluvia mantello (1976). Le jorno affabile pro parolas (1976). Ancora un vice viver sur le terra (1989). Le cerca del tono azur (Fryderik Chopin) (1989). Armenia, pais ubi io vadeva in mi phantasia (1983). Le arbores marcha in le urbes (1984). Bevor die neunte Welle (L. van Beethoven) (1985; edition illegal, in germano traducite per le poeta L. Kundera). Io vota pro le homine in facto human (1986). Vostre planca nostre plafon (1988). Quadrangulo super le hypotenusa del amor (1989). Le alauda canta sur le beton armate (1990). Sia contente, que tu non es le lapide ardente sur le stratas (1994). Ille recipeva le 2-nde premio litterari in le anno 1995.

De initiativas on non sempre deveni ric. Assi remarcava le sposa de Ladislav Podmele, qui insenia russo e anglese: “Tu sempre propaga interlingua, tu sempre usa moneta. Io insenia linguas, io recipe moneta.” Ladislav Podmele participava in le 12-nde Conferentia International de Interlingua in Praga in 1995.

Alcun dies post su morte appareva duo libros – un in tcheco, un altere in germano – super su poesia, super su pensatas, e alcun poemas de su anniversarios.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua