|
 |
Mi prime contacto
con interlingua
Panorama ha demandate a un serie de usatores de interlingua, como esseva lor prime contacto con le lingua. Lor narrationes es instructive, a vices curiose, surprendente e amusante.
(Publicate in Panorama in Interlingua, novembre-decembre 2003)
 PAOLO
CASTELLINA (Suissa), presidente del Union Interlingua de Helvetia:
Desde mi juventute io esseva multo interessate in linguas (natural) e
... grammaticas. Forsan illo pote esser considerate un estranie subjecto de attention pro un juvene, ma, de facto, io
... faceva collection de grammaticas e de dictionarios de multe linguas. Isto non significa que io sapeva parlar los omnes,
illo esseva (e remane) un simple cognoscentia encyclopedic. In ultra, io esseva semper multo passionate del lingua, cultura e litteratura anglese. De facto anglese esseva le subjecto scholastic in le qual io semper excelleva grandemente. Io legeva libros e interteneva multe correspondentia in anglese. Me fascinava, super toto, le utilitate del lingua anglese quam lingua international e mesmo nunc io continua usar lo currentemente in mi excambios quando illo servi.
Io habeva 15 o 16 annos, tamen, quando io discoperiva Esperanto. Io lo studiava, contactava altere interessatos e deveniva io mesme enthusiastic
de illo. Sin denegar le importantia del anglese, io discoperiva que Esperanto esseva un optime e practic idea, multo plus facile
que le linguas natural e plus apte pro le communication international. Io, assi, deveniva active in le movimento esperantista italian durante plure annos, quando un die... Si, un certe die io visitava le sede del movimento esperantista del citate de Torino. Reguardante le multe libros interessante que se trovava ibi (io esseva e es semper multo curiose), io discoperiva in un armario qualcosa que attraheva mi attention: le "Revista de Interlingua", de Ric Berger, Suissa. "Que es isto?", io me demandava, "estranie lingua...". Io assi legeva un poco le
interlingua in le revista e lo trovava tosto, in mi oculos, extrememente belle e
harmoniose, ... multo plus que Esperanto!
Io assi demandava explicationes al esperantistas local, le quales me respondeva que illo, Interlingua, esseva solmente un stupide projecto inter alteres, un essayo sin futuro... Le futuro pertineva - secundo illes - naturalmente a Esperanto! Io, pois, diceva: "Pote io portar iste revistas de Interlingua a mi casa e leger los plus attentivemente?", e le responsa esseva: "Si, certemente, ma non perde tu tempore con ille immunditia! Nos es felice de liberar le spatio in nostre armarios...".
Le facto, durante le passar del tempore, esseva que io me disamorava semper plus de Esperanto e
... me inamorava de Interlingua! Io comenciava cognoscer e appreciar su principios de fundation, e assi, gradualmente io abandonava le movimento esperantista e comenciava interessar me semper de plus del varie publicationes in Interlingua. Certemente io non poteva gauder, con Interlingua, de un movimento organisate in Italia pro supportar lo. Io perveniva a cognoscer varie personas in Europa que promoveva Interlingua. "Non importa," io
me diceva, "si il non ha un forte movimento pro Interlingua comparabile a illo de Esperanto. Le idea es optime e merita esser supportate. Il non es le
fortia del adherentes a determinar le ver successo de qualcosa, ma la fortia del ideas, mesmo si non multes lo supporta...".
Tote isto, certemente, es coherente con mi personalitate, semper plus tosto anticonformista,
isto nonobstante, probabilemente, es lo que de me multes poterea pensar... On poterea dicer que, mesmo in altere spheras, io es specialisate (como on dice in italiano)
"in causas perdite". Io dice semper, tamen, que non importa si eventualmente io es le sol a supportar qualcosa
... in le tote mundo! Si le idea vale, como io pensa que Interlingua de facto vale, io essera con illo. Isto non significa, tamen, esser fanatic pro illo, no. Io continua appreciar e usar le lingua anglese quando illo servi, ma si on pote convincer le publico que Interlingua esserea un idea melior, io lo face e usa Interlingua!
Revidite: 2006-12-29 |
|
|
