|
 |
Mi prime contacto
con interlingua
Panorama ha demandate a un serie de usatores de interlingua, como esseva lor prime contacto con le lingua. Lor narrationes es instructive, a vices curiose, surprendente e amusante.
(Publicate in Panorama in Interlingua, julio-augusto 2002)
BARBARA RUBINSTEIN (Svedia), presidente del Union Mundial
pro Interlingua:
In le primavera de 1994 io participava in un curso universitari in technica de administration. Un del participantes in iste curso esseva un femina polonese, con le qual io faceva cognoscentia. E illa me diceva, que illa habeva planos pro studiar un altere subjecto, un lingua international. Io esseva curiose e illa me monstrava un annuncio taliate de un jornal ubi io legeva que il existe un (pro me non cognoscite) lingua international, interlingua, e que on pote commandar un manual pro un parve summa de moneta. Alora, ancora plus curiose, io commandava iste libros (de
Ingvar Stenström), e lo legeva del initio al fin in alcun dies. Post isto Ingvar Stenström me telephonava e demandava si io voleva ir a un conferentia nordic de interlingua jam le estate de 1994. Con grande hesitation, io acceptava, e arrivava con mi filia Yvonne a Sundsgården, presso de Helsingborg. Durante le conferentia nos ambes faceva multe nove e amabile cognoscentias e nunc nos participa in quasi tote conferentias nordic e international. Le femina polonese, qui me informava super interlingua, non ha ancora apprendite interlingua, ma illa ha planos de facer lo...
Revidite: 2006-12-29 |
|
|
