Victor A. Tchernavski

Russia
Nascite: 26 de decembre 1970

Victor A. Tchernavski ha desde le fin de 1995 essite le representante de interlingua in Russia - e le plus juvene jammais.

Ille, qui nasceva in le region autonome Hanty-Mansi in Siberia, esseva in 1995 appunctate representante in le etate de solmente 24 annos, substituente Valentin Pessenko, Rostov na Donu, qui debeva quitar le posto a causa de manco de tempore libere. Le carga enorme non terrificava Victor Tchernavski.

Post studios in le collegio de telecommunicationes in Yekaterinburg (antea Sverdlovsk), Victor Tchernavski esseva empleate como ingeniero in Uraltelecom, le firma de telecommunicationes regional in Alapayevsk, ma travalia desde 1996 como un programmator in le Officio del Servicio Postal de Alapayevsk. Le labor assi cambiava de telecommunicationes al communicationes postal, e naturalmente "electronicamente postal". E communication es essential pro ganiar le multe – e sempre plus de – interessatos in le grande Russia. Le uso de e-posta ha adjutate multo a isto.

Victor Tchernavski ha studiate interlingua desde 1988 e comenciava in januario 1995 publicar le magazin pro interlinguistas russophone "Lingua International in Russia", un bon ligamine inter interessatos. Le crescente costos de expedition totevia ha claudite temporarimente le magazin.

Su grande projecto es le dictionarios interlingua-russe e inverse. Le dictionario interlingua-russe in su forma concise, "Dictionario concise interlingua-russo" con 8.000 parolas, esseva publicate in 1997. Le russos expecta ancora su grande version.

Victor Tchernavski participava in le conferentia international de interlingua in Strasbourg in 1997, ubi le participantes le apprendeva cognoscer per su bon humor e energia.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua