Interlingua a exposition mundial

Le prime computator del mundo con disco dur cognosceva interlingua. Isto esseva demonstrate al exposition mundial.

Per Thomas Breinstrup

Interlingua esseva inter le dece linguas usate, quando le gigante IBM al exposition mundial in Bruxelles in 1958 presentava le prime computator del mundo con un disco dur.

Al exposition un enorme calculator electronic faceva possibile controlar su sapientia. In le pavilion american, un 305 RAMAC ab IBM functionava como un libro de historia con omne eventos essential in le historia mundial ab anno 4 a.Chr. usque a ille tempore.

"E le machina non solmente sape tote isto, ma illo pote presentar le informationes in dece linguas: Nederlandese, anglese, francese, germano, italiano, portugese, russo, espaniol, svedese e le international lingua artificial interlingua," scribeva le quotidiano danese Social-Demokraten le 21 de april 1958.

Inter 1.200 questiones possibile, le plus frequentes esseva: Proque habeva Maurice Maeterlinck timor de su prenomine? Qual parola in francese es le plus difficile a pronunciar? Qual precio pote un pictura de van Gogh attinger? Si on jammais potera viagiar al Luna, alora esque on anque pote retornar ab illo?

Le 305 RAMAC (Random Access Method of Accounting and Control) esseva le prime systema con un memoria sur un disco: cinque milliones de characteres poteva esser stockate, correspondente a 5 Mb (e a un precio de 10.000 dollars per Mb)! Illo esseva annunciate per IBM in septembre 1956 e costava 35.000 dollars per anno in location - nam IBM non lo vendeva. Le 305 RAMAC habeva le duple grandor de un refrigerator moderne.

Un qualcunque portion del historia poteva esser trovate per RAMAC in minus que duo tertios de un secunda e pois esser imprimite a un electric machina a scriber de IBM que esseva un parte del computator historic.