|
 |
Le historia del historia
Colliger le historia es un labor sin fin - ma un labor con grande valor. Ci se
presenta le historia del historia de interlingua, como illo ha evolvite post un anno de
labor public. Un labor que certo non es finite.
Per Thomas Breinstrup
Historia es sin fin. Ma illo es popular, e le reactiones es numerose.
Isto debe esser constatate post un anno de colliger materiales pro
describer le historia de interlingua. Le 15 de januario, al 50-esime anniversario de
interlingua, esseva lanceate un section special in Internet con un varietate de articulos,
biographias e materiales super interlingua de multe paises del mundo. E durante tote iste
anno jubilari, que fini ora, nove materiales ha supplementate lo.
Le interesse ha essite enorme. Le grande machinas a cercar in Internet
ha ligamines al majoritate del paginas presentate. Le visitatores ha contribuite con
informationes supplementari, nove materiales etc.
Le resultato es que le conscientia historic de interlingua ha crescite.
Le historia documenta le labor scientific seriose e profunde que esseva facite durante 27
annos ante de publicar interlingua in 1951. Iste factos es ora conservate e sempre
developpate con nove detalios. Le sito historic assi functiona como un encyclopedia sub
revision constante, un loco, que es diligentemente consultate per personas qui vole saper
plus super interlingua.
Le realisation del historia – in prime instantia electronic –
adde seriositate a interlingua, e gratias al motores a cercar de Internet le paginas
obtene un ample publico, quando on cerca information relevante super interlingua, anque
super parve eventos.
In foros electronic de discussion in Internet on ora discute como
conservar partes plus grande de materiales e documentos del historia de interlingua.
Durante al minus dece annos, varie interessatos habeva parlate de colliger le historia de
interlingua. Le majoritate remaneva parlar, nam le carga esseva enorme. Le grande problema
esseva obtener un supervista – ubi comenciar e ubi finir? Un altere problema non
minus grande esseva como editar un libro si spisse como certo devenirea le resultato del
labor. E, finalmente, ubi trovar le personas competente pro colliger le pecias historic al
grande puzzle.
Le redaction del Panorama comenciava per parve interviews, parve
notitias, parve articulettos pro assi trovar e publicar parve fragmentos del historia.
Simplemente pro haber un fundamento.
Le 15 de januario 2001 esseva considerate le die, ubi interlingua
habeva 50 annos. Es difficile fixar le "data de publication" de un libro, ma
durante un decennio le 15 de januario ha essite considerate le Die de Interlingua. A iste
data in 1951 esseva registrate le prime obra, "Interlingua-English Dictionary",
in le officio american de derectos de autor.
In le initio de 2000 il deveniva clar que il esserea absolutemente
impossibile haber preste un complete libro super le historia de interlingua pro le
jubileo. In vice, on considerava usar Internet pro publicar le recercas e trovatas poco a
poco, si tosto que illos esseva cata uno finite. Internet ha le grande avantage de poter
esser revidite tote le tempore. Additiones pote sempre esser facite, errores pote esser
corrigite, nove informationes pote esser publicate, etc. Le visitator sempre vide le
resultato, como illo es in le mesme momento, quando illa o ille reguarda le paginas.
In Internet, documentos rar e fundamental pote esser facilemente
publicate in extenso. Litteras, magazines, libros etc. pote esser demonstrate como
facsimiles, assi que le documentos genuin pote esser legite per le visitatores sin filtro.
Isto adde al credibilitate de interlingua.
Le disavantage de Internet es que tote le material es fornite
gratuitemente al lectores. On alora non pote esser secur que le mesme personas compra le
libro. E un tal publication non pote apparer sin lectores pagante.
Un avantage ulterior de publicar le historia in pecias sur Internet es
que on involve directemente le lectores visitante. Illes pote leger le resultatos usque
ora e contribuer mesme, quando illes discoperi qualcosa que illes pote supplementar.
Assi le historia deveni vivente. E illo non fini ci. Le labor de
colliger lo continua anque in 2002, e le redaction non pote assatis demandar que omnes lo
supporta.
Le libro(s) final debe esser le historia.
Revidite: 2006-12-29 |
|
|
|
|
|
| FACTOS |
Thomas Breinstrup, redactor de Panorama, describe le
labor - e valor - de colliger le historia de interlingua. Ille es parte del redaction
historic. Le articulo esseva presentate in Panorama novembre-decembre 2001 |
|
