Scientia international
Alexander Gode, qui redigeva
Scientia international in interlingua, presentava le prime edition de
julio 1952 assi:
"*** Ecce le prime numero del prime anno del periodico Scientia
international. Illo es un chronica de factos e eventos de
interesse currente ex omne partes e sub-partes del scientias natural e
se adressa al scientistas e al amicos del scientias in omne partes del
mundo. Illo se distingue de multe publicationes de character
comparabile per le absentia in su columnas de omne genere de
specialisation. Illo parla de atomos e aeroplanos, de metallurgia e
medicina. Illo non se restringe a servir specialistas de iste o ille
disciplina; illo cerca interessar expertos ex numerose campos de
specialisation, non solmente in lor proprie problemas sed etiam in le
problemas del disciplinas vicin in que illes es laicos como le resto
del humanitate. In iste senso Scientia international es
un publication general pro expertos e simultaneemente un periodico
specialisate pro lectores laic.
*** Sed tote isto non indica le character unic de Scientia international.
Il existe in varie paises numerose publicationes non plus restringite
in lor scala de interesse que illo. Omnes, non-obstante, remane
limitate in lor utilitate per le limites del lingua in que illes es
redigite. Scientia international non cognosce tal
limites. Redigite in interlingua illo es immediatemente comprensibile
pro lectores del plus variate ambientes linguistic. Le
internationalismo de interlingua deveni un symbolo del
internationalismo del spirito scientific. Lectores francese comprende Scientia
international proque illes parla francese; lectores italian lo
comprende proque illes parla italiano ...; e scientistas e amicos del
scientias in omne partes del mundo comprende Scientia international
proque illes parla le lingua del scientias que es un lingua
international.
*** Le scientias que es international require un libere fluxo de
informationes al quatro angulos del mundo. In isto, Scientia international
pote assister los. Scribite in lingua international, illo non cognosce
limites linguistic, como le spirito del scientias non cognosce limites
de racia o de nationalitate.
*** Ben que le functiones practic de un periodico como Scientia
international es frappantemente clar, le difficultates a
superar pro avantiar le interprisa usque al apparition del prime
numero non esseva negligibile. Pro succeder nullo minus esseva
requirite que le intime cooperation de duo organisationes
representantes distinguite del reportage scientific de un latere e del
altere del practica interlinguistic.
*** Le realisation de tal cooperation - evidentiate per Scientia
international nunc remittite inter le manos de su lectores - es
le merito de Watson Davis de Washington. Membro del consilio
directoral de IALA (International Auxiliary Language
Association) e simultaneemente director de Science Service,
le ben-cognoscite instituto dedicate al propagation de informationes
scientific, senior Davis esseva le primo a comprender le
possibilitates constructive de combinar le ressources del duo
mentionate organisationes. Le resultato es Scientia international,
redigite per IALA e publicate per Science Service.
A.G."
Scientia International, volumine 1, numero 1, julio 1952
pagina 1 | pagina
2 | pagina 3| pagina
4 |
 |
|
