Iste consilios de como usar interlingua correctemente ha essite publicate in le magazin official del Union Mundial pro Interlingua, Panorama in interlingua.

Attention al -(i)ente

  Le si-appellate participio presente de un verbo es in interlingua formate per adder -nte, quando le verbo in su infinitivo termina in -ar o -er, ma -ente, quando le verbo termina in -ir:

trovar – trovante
vider – vidente
audir – audiente

Un serie de verbos (caper, facer, saper) plus verbos que termina in -ciper, -ficer, -jicer, -spicer (per exemplo: reciper, calefacer, sufficer) anque termina in -iente:

caper – capiente
facer – faciente
saper – sapiente
calefacer – calefaciente
reciper – recipiente
sufficer – sufficiente

Plus de exemplos:

Su actos esseva choccante. Le situation es menaciante. Passante le laco nos videva le cygnos. Vidente le casa ardente illa alarmava le pumperos.

Iste formas del participio presente pote anque esser usate como substantivos (e on adde le -s normal in le forma plural):

Duo passantes videva le captivo fugiente.
Illa eveliava le dormientes.