Parolas del mense

Iste consilios de como usar interlingua correctemente ha essite publicate in le magazin official del Union Mundial pro Interlingua, Panorama in interlingua.

Redaction: Thomas Breinstrup
Memora que tu pote sempre consultar le Commission Linguistic del Union Mundial pro Interlingua super questiones lingual de interlingua. Clicca in le navigation a sinistre al puncto Commission Linguistic pro ir al formulario.

In – a in

  In multe linguas on usa varie casos grammatic pro indicar, si on parla de un movimento o non. Pois que interlingua non ha omne iste casos, le prepositiones in vice deveni importante. E como omnes sape, prepositiones – al minus le prepositiones correcte – es le plus difficile in omne linguas.

Que es le differentia inter iste phrases:

1. Illes pulsava Hugo in un angulo
2. Illes pulsava Hugo a in un angulo

In le prime phrase, illes omnes ja es in le angulo e pulsa Hugo. In le secunde phrase, Hugo es pulsate in le direction del angulo, verso le angulo.

Similemente il ha un grande differentia (!) inter:

1. Ille saltava a in le lecto
2. Ille saltava in le lecto

In le prime phrase, ille hasta verso su lecto. In le secunde phrase, su parentes certo non essera gaudiose – specialmente non si le lecto rumpe a causa de su peso...