Iste consilios de como usar interlingua correctemente ha essite publicate in le magazin official del Union Mundial pro Interlingua, Panorama in interlingua.

Le caso del caseo

  Le caseo (pronunciate [kaseo]) es un mangiar deliciose e existe in multe variantes: caseo cremose, caseo grasse, caseo vetule/vetere, caseo magre, caseo piccante, caseo raspate, caseo fumate, caseo fundite e caseo con/sin crusta. Il pote haber foramines in le caseo, e si on pote seliger inter multe variantes, il ha un grande assortimento de caseos.

On pote prender un pecia de caseo o un cubo de caseo (un quadrato), e on pote facer fondue al/de caseo (fondue pronunciate in maniera francese). Forsan on ama un biscuit al caseo o un sandwich al caseo, forsan sauce al caseo, un soufflé al caseo o un torta al caseo.

On pote placiar le caseos sub un campana a caseo pro impedir que le odor de illos se diffunde in tote le casa.

E quando on del toto vole mangiar le caseo, proque on desira un trencho [-sh-] de caseo, on besonia le bon utensiles. In le photo tu vide:

1) un trencha-caseo [-sh-]
2) un filo pro le trencha-caseo [-sh-]
3) un cultello a/de caseo
4) un plana a/de caseo