Parolas del mense

Iste consilios de como usar interlingua correctemente ha essite publicate in le magazin official del Union Mundial pro Interlingua, Panorama in interlingua.

Redaction: Thomas Breinstrup
Memora que tu pote sempre consultar le Commission Linguistic del Union Mundial pro Interlingua super questiones lingual de interlingua. Clicca in le navigation a sinistre al puncto Commission Linguistic pro ir al formulario.

Un supertoto es ... super toto

  Que es le differentia de supertoto e super toto? Isto es un del exemplos de como un spatio face un grande differentia.

Supertoto in un parola es un substantivo, un mantello que on porta quando le tempore non es bon, e on pro isto desira esser protegite contra vento, pluvia etc. Le supertoto ha obtenite su nomine, proque illo coperi super toto, i.e. super tote le corpore, assi que le pluvia e le vento frigide non pote entrar al corpore.

E assi il deveni clar que super toto (in duo parolas) es un adverbio, un maniera fixe de exprimer se. Le notion es similar a ante toto, i.e. ante tote altere cosas. Alcun exemplos: Io veni ante toto proque tu mangiar es si bon. Ille es super toto cognoscite como un bon cantator. Multe animales es in periculo, super toto gorillas e chimpanzes.