Parolas del mense

Iste consilios de como usar interlingua correctemente ha essite publicate in le magazin official del Union Mundial pro Interlingua, Panorama in interlingua.

Redaction: Thomas Breinstrup
Memora que tu pote sempre consultar le Commission Linguistic del Union Mundial pro Interlingua super questiones lingual de interlingua. Clicca in le navigation a sinistre al puncto Commission Linguistic pro ir al formulario.

Omne, tote, cata

  Le uso false de omne, tote e cata confunde multes e es un error commun in textos in interlingua.

In contextos plural o collective, omne e tote es equal in lor uso, e il es un question de stilo, qual parola on prefere: Omne personas in le camera es gaudiose. Tote personas in le camera es gaudiose. Nos es omnes de accordo. Nos es totes de accordo.

Cata sempre indica un singular. Il se tracta de iste singule persona, animal, cosa etc. pro indicar que mesmo si il ha un multitude, cata singule objecto vale: Cata septimana io ambula in le natura. Ille mangia yogurt cata matino.

E isto illustra ben le differentia inter omne/tote e cata: omne/tote es plural o concerne plures, e le parola a sequer que es describite assi anque debe esser plural (si il non tracta un entitate, p.ex. tote le mundo, ultra omne sperantia, in omne caso), durante que cata es singular, assi que anque le parola describite debe esser singular: omne duo juvenes non mangia jentaculo – cata secunde juvene non mangia jentaculo. Ambe phrases significa le mesme cosa, ma le maniera de describer lo es differente.