Parolas del mense

Iste consilios de como usar interlingua correctemente ha essite publicate in le magazin official del Union Mundial pro Interlingua, Panorama in interlingua.

Redaction: Thomas Breinstrup
Memora que tu pote sempre consultar le Commission Linguistic del Union Mundial pro Interlingua super questiones lingual de interlingua. Clicca in le navigation a sinistre al puncto Commission Linguistic pro ir al formulario.

Quante/quanto quando?

  Un singule littera face un grande differentia. Le par de parolas quante e quanto confunde sovente nove parlatores de interlingua.

Quante (= qual numero de) como adjectivo sempre require un "explication" – on debe sempre mentionar le typo de objectos/personas/animales cuje numero on cerca: Quante moneta ha tu? Quante personas veni pro le lunch? Quante horas dura le examine?

Quanto, al contrario, es singule e assi functiona sin altere parolas como adverbio: Quanto costa iste jornal? Quanto es isto? E on pote usar lo anque con adjectivos: Quanto grande es le arbore? Quanto longe es le strata?

Quanto es usate in alcun expressiones fixe – quanto ... tanto e quanto a...: quanto plus grande tanto melior (= le plus grande un cosa es, le melior illo es). Quanto a me, non te inquieta (= concernente me).

Ma quanto anque es un substantivo normal, que indica un multitude, un summa: Da me un quanto del sal, per favor.

(Del resto, non intermisce quanto con quando (= a qual tempore). Quando es un question o indication super tempore: Quando veni le traino? Io veni, quando io ha finite mi labor.)