Audi interlingua e lege le texto. Iste combination es optimal, quando on vole apprender le lingua. Pro isto, le Union Mundial pro Interlingua (UMI) comencia offerer files audio pro materiales publicate ci in www.interlingua.com

Diverse textos, ante toto le material pro apprender interlingua in le inseniamento, essera registrate in le formato le plus popular de sono, MP3. Assi on pote audir le texto pronunciate directemente al schermo, o on pote discargar le files MP3 e ascoltar lo per su apparatos MP3, durante que on face altere cosas. Le materiales audio con interlingua in uso practic es specialmente un servicio pro personas, qui non habita vicin a altere usatores de interlingua e assi non audi le lingua si sovente.

Le intention es anque - plus tarde - adder breve films de video a www.interlingua.com.

Le UMI invita omne visitatores e membros a contribuer con lor material pro studiar interlingua (textos e exercitios) que pote esser de valor pro alteres e assi supportar le inseniamento de interlingua in tote le mundo.

Le material - textos e audio - solmente es disponibile pro visitatores registrate a www.interlingua.com. Si tu non ancora te ha registrate, retorna al prime pagina de www.interlingua.com e crea un conto de usator per usar le cassa "Identification" in le parte sinistre del pagina. 

Le files MP3 providite per www.interlingua.com es, como tote le altere material providite per iste sito de Internet, coperite per le derecto de autor. Isto significa que on naturalmente pote usar lo personalmente, ma que il non es permittite distribuer lo a alteres, ni publicar lo in altere manieras, p.ex. per altere sitos in Internet o sur CDs/DVDs, sin le permission in scripto del possessores del derecto de autor.

Visita le section Inseniamento pro leger - e audir - plus. Anque le Bibliotheca electronic in interlingua offere certe textos registrate in le formato MP3.