UMI  Un serie de libros antique ha date summa de moneta si remarcabile, que cinque juvenes ha potite assister in le conferentias international de interlingua.

Isto es le resultato de un action del Societate Svedese pro Interlingua. Le SSI recipeva de duo membros, Gunnar Ljusterdal e Yngve Sköld, lor collectiones de libros de projectos de linguas auxiliar. Durante le passate annos, le collectiones ha essite vendite in partes per le sito del SSI in Internet, www.interlingua.nu. Tote le moneta vadeva directemente al Fundo pro Europa Oriental, establite in 1993.

Iste cassa non es un parte del Union Mundial pro Interlingua (UMI) o del SSI ma un cassa totalmente independente. Illo supporta le expedition gratuite de libros de interlingua e le revista Panorama a personas habitante in paises, ubi il esseva o ancora es difficile transferer moneta al UMI. Ma illo anque subventiona le participation de personas non troppo ric - generalmente juvene interlinguistas - a conferentias de interlingua. Personas interessate in diverse linguas artificial assi ha indirectemente pagate pro le labor de diffunder interlingua ancora plus per ingagiar juvenes in le organisationes de interlingua.

"Gratias a iste donationes de libros, cinque juvene interlinguistas ha potite participar gratias in nostre conferentias international, alteremente impossibile a illes," dice Ingvar Stenström, secretario del SSI, multo satisfacite del resultato e grate al compratores, qui assi ha financiate le diffusion de interlingua.

Del collectiones remane hodie solmente poc libros.