UMI  Le 1 de januario 2008 marca un cambio importante pro le Union Norvegian pro Interlingua (NIU). A iste data, le organisation habera un toto nove direction.

Åsmund Knutson Aukland, qui esseva co-fundator del NIU in 1992 e ha essite su presidente durante le majoritate del tempore, ha desirate retirar se pro poter devenir un normal membro active. E ille non solmente ha trovate su successor como presidente. Le postos como secretario, que ille anque ha occupate pro un periodo, e como tresorero, que Ruth Knutson ha administrate, anque habera nove facies.

Le nove presidio del NIU consistera de Roger A. Rognaas como presidente, Magne Heie como secretario e Rolf Arvid Rökeness como tresorero. Illes omnes ha essite membros del NIU pro un periodo. Åsmund Knutson Aukland les adjuta in le periodo initial.

Le NIU anque debe appunctar duo membros al consilio general del Union Mundial pro Interlingua (UMI). Actualmente, le sol consiliero es le presidente presente.

Le quatro organisationes in le paises nordic - le Union Norvegian pro Interlingua, le Societate Svedese pro Interlingua, le Union Danese pro Interlingua e le Association Finlandese pro Interlingua - ha un extense collaboration, partialmente a causa del linguas multo simile (norvegiano, svedese e danese). Illos organisa omne duo annos le incontros nordic de interlingua, e le Societate Svedese pro Interlingua ha duo vices organisate conferentias international de interlingua, in 1991 e 2005.

In commun, le quatro organisationes nordic de interlingua publica le magazin "Actualitates - Interlingua i Norden", que appare omne tres menses.

Tote le membros del NIU essera informate directemente super le fortificate labor in le organisation. Le magazin Actualitates presentara le nove direction in su proxime edition, e anque le magazin de novas in interlingua, Panorama (publicate per le UMI), va scriber plus super le nove presidio in su edition de novembre-decembre, actualmente sub redaction.