www.interlingua.com introduce le libro del mense.

Cata mense un libro del ric litteratura in interlingua essera presentate e recommendate. Le libros non necessarimente es titulos recente, illos pote esser prendite del litteratura existente. Ma tote le libros pote esser comprate del Servicio de Libros ci in www.interlingua.com, ubi on pote pagar directemente per carta de credito.

Le spero es que le presentationes pote incoragiar plus de personas a comprar le libros in interlingua - non solmente pro haber un nove experientia ma anque pro perfectionar lor linguage e obtener un vocabulario plus grande e active in interlingua. Si on vole apprender un altere lingua, le optime methodo es leger multo, e felicemente le catalogo de libros in interlingua es extense.

Le prime libro del mense es "Le casa del sonios" per A. Petit. Le vice-secretario del Societate Svedese pro Interlingua, Erik Enfors, presenta le libro. Studia su presentation ci.

Centos de libros in - e super - interlingua pote esser comprate del grande catalogo del Servicio de Libros UMI. Ci on marca le libros, que on desira comprar, insere su nomine, adresse etc., e paga directemente del sito con su carta de credito. Pois le libros es expedite. Visita le Servicio de Libros UMI ci.

Le vendita de libros es un parte del activitates del Union Mundial pro Interlingua pro ganiar moneta pro nove publicationes (sur papiro o como e-libros), pro materiales de information super interlingua, pro le publication continue de le magazin international de novas Panorama in interlingua e pro campanias de information. Tote libros vendite assi contribue al diffusion de interlingua, proque illos da medios pro sempre plus de labor. Pro isto, supporta interlingua per comprar su litteratura.