Un grande articulo de quatro paginas super interlingua ha essite publicate in le magazin american Liberty. Leland B. Yeager, qui esseva le presidente del Union Mundial pro Interlingua (UMI) inter 1993 e 1999, es le autor del articulo, publicate in le edition januario-februario.

"Learning From Interlingua" (Apprendente de interlingua) es le titulo del articulo, cuje presentation dice: "Un lingua ha essite discoperite que nos adjuta discoperir le natura de lingua. E illo anque es amusante." Le autor describe le professionalismo detra interlingua que es de grande valor pro omnes. Le articulo publica plure tabellas con factos, i.a. un comparation inter parolas in interlingua e altere linguas e un longe texto in interlingua pro demonstrar, como facile illo es a comprender.