Le Association Cuban pro Interlingua es un realitate, e illo ja ha comenciate publicar su magazin electronic, Manuscripto.

Leriel Modesto Garcia Calderòn es le redactor del magazin informative que appare omne duo menses in formato digital e es inviate gratis a tote le abonatos. Le prime edition se data januario-februario 2008 (vide le illustration) e publica varie novas in interlingua del sito del Union Mundial pro Interlingua (UMI), www.interlingua.com. Le magazin ha su proprie sito in Internet, http://manuscriptocu.blogia.com.

"Un gruppo de quasi vinti personas integrate de professores e studentes del Universitate Central "Marta Abreu" de Cuba ha comprendite le besonio a apprender interlingua pro avantiar verso un futuro developpate. Le objectivo fundamental es organisar le Association Cuban pro Interlingua (ACI), postea apprender lo pro diffunder e promover le inseniamento del lingua in Cuba. Un momento importante ha essite le creation de un blog trovate al sito http://manuscriptocu.blogia.com pro meliorar le uso del interessatos. Nos omnes lucta per iste bellisime lingua que sera essential a nostre developpamento," dice Leriel Modesto Garcia Calderòn.