"Nove lingua debe esser comprendite per 600 milliones de personas," scribe le quotidiano regional del parte central de Svedia, Östgöta Correspondenten, in un grande articulo super le 11me incontro nordic de interlingua que habeva loco in Linköping le 28 de julio al 3 de augusto.

Le articulo de cinque columnas publicate le 2 de augusto es un interview con Ingvar Stenström, secretario del Societate Svedese pro Interlingua, e illo include un breve presentation de interlingua con exemplos del lingua. Illo anque mentiona le cursos intensive de interlingua e le incontro anterior in le urbe vicin, Vadstena, in 2006.

Reportos plus extensive del incontro nordic de interlingua, que attraheva participantes de 10 nationes (assi anque essente non-nordic), va apparer in Panorama in interlingua e in le magazin commun del quatro organisationes nordic de interlingua "Actualitates".