Duo grande articulos super interlingua ha essite publicate in anglese e germano.

Tote le copertura del section "Wochenend-Journal" del quotidiano Augsburger Allgemeine presentava le 5 de julio interlingua, gratias a un grande interview con Sven Frank, 33 annos, active germano e organisator del prime conferentia german de interlingua. "Bon die! Grüß Gott!" dice un grande illustration capturante del jornal que es publicate in le citate Augsburg.

Le articulo narra del prime conferentia german, e proque interlingua es un lingua utile in multe situationes. Illo describe le planos de establir un Deutsches Interlingua-Institut, educar professores de linguas e traductores, introducer interlingua in instructiones/manuales e menus, etc. pro assecurar un uso plus general.

In un grande section con factos, interlingua, le Union Mundial pro Interlingua e su magazin Panorama in interlingua es presentate, le adresse electronic de Sven Frank es publicate, e il ha un exemplo de un texto in interlingua, prendite de "Le princessa dormiente" del fratres Grimm, traducite per Sven Frank pro le Bibliotheca electronic in interlingua de www.interlingua.com.

Interlingua pro le globalisation

Le edition primaveral del magazin "Language at Work" (Lingua a labor), publicate in anglese per le Schola Commercial in Århus (Danmark) in collaboration con i.a. le Universitate Suddanese, ha apparite con un articulo ricamente illustrate de sex paginas super interlingua. Le autor es Thomas Breinstrup, secretario del Union Danese pro Interlingua e redactor del Panorama in interlingua.

Le articulo - "Communications without borders - Interlingua in a globalization perspective" (Communication sin frontieras - Interlingua in un perspectiva de globalisation) - contine multe cassas con factos super i.a. le UMI como organisation international, super le inseniamento de interlingua in gymnasios svedese, un lection fulmine de interlingua con vocabulario e grammatica e, naturalmente, un "Summario in interlingua". Le articulo describe detaliatemente interlingua, le uso practic del lingua, le utilitate de apprender lo, le UMI, le conferentias international de interlingua, le 11me incontro nordic de interlingua in julio-augusto 2008 etc. On trova le adresse de Internet del UMI (www.interlingua.com) e vide i.a. un photo de un integre pagina del demonstration pro interlingua durante le 10me incontro nordic de interlingua in 2006 e un grande photo de un assortimento ric e variate del litteratura in interlingua.

Un serie de usatores active de interlingua describe in le articulo como interlingua pote assecurar communication sin frontieras - le motto del Union Mundial pro Interlingua durante decennios.