Le dictionario interlingua-nederlandese de plus que 1.000 paginas in duo volumines es preste. Duo altere grande dictionarios pote multo tosto esser comprate.

UMI  Un del dictionarios le plus grande in interlingua ha apparite in duo volumines con plus que 1.000 paginas.

Le "Dictionario interlingua-nederlandese" per Piet Cleij, le vice-secretario del Union Mundial pro Interlingua, es preste in su 9ne edition, ora imprimite per le casa editorial espaniol Lulu.com. Le dictionario es un tresor pro primarimente omnes, qui parla o comprende nederlandese, ma anque alteres pote haber grande uso de illo pro controlar formas e parolas in interlingua.

Piet Cleij es un habile lexicographo, qui ha publicate numerose dictionarios, vocabularios e altere listas con parolas in interlingua. Ille labora cata die pro augmentar le vocabulario de su dictionarios ma ha anque publicate recentemente un dictionario francese de interlingua e un grande dictionario con terminos biologic in interlingua.

Le precio del "Dictionario interlingua-nederlandese" in duo volumines es 40 euros plus le porto postal. Illo pote esser comprate per Lulu.com.

Intra breve apparera anque le "Dictionario nederlandese-interlingua" de 2.000 paginas in tres volumines A4 per Lulu.com. Le precio de illo essera 69 euros plus porto postal.

E finalmente le "Dictionnaire Français-Interlingua" (Dictionario francese-interlingua" de 456 paginas A4 in un singule volumine es super le puncto de esser imprimite. Le precio de illo essera 25 euros plus porto postal.

Compra le "Dictionario Nederlandese-Interlingua" per Lulu.com

Dictionario interlingua-nederlandese
Le enorme dictionario interlingua-nederlandese es in duo volumines clarmente colorate e pote ora esser comprate. Photo: Thomas Breinstrup