Un ver experientia hypnotic e un interview con le nove secretario general del UMI es le nove emission de Radio Interlingua.

UMI  Le tertie emission de Radio Interlingua es - explicitemente - un experientia hypnotic. Nam le radio presenta un ver fragmento de un hypnose in interlingua.

Radio Interlingua que pote esser ascoltate directemente de www.interlingua.com o como discargas (o podcasts) in le formato MP3, es preste con su tertie emission. Iste vice le redactor del radio, Péter Kovács, ha interviewate Sven Frank, qui esseva recentemente eligite nove secretario general del Union Mundial pro Interlingua (UMI). Sven Frank, qui es germano, es de profession hypnotherapeuta, e assi il esseva natural presentar un fragmento de un hypnose in interlingua, como Sven Frank lo de facto usa in su labor. Si le radio assi succede ganiar nove ascoltatores fidel, remane a esser vidite...

Le interview esseva facite durante le incontro nordic de interlingua in Svedia in le fin de julio e assi ante que Sven Frank deveniva le secretario general del UMI.

Iste vice le radio ha un nove co-presentator, a saper Josu Lavin del Pais Basc.

In fin del emission il ha le actualitates de interlingua.

Radio Interlingua reaperiva in augusto. Le intention es facer un emission per mense con interviews, novas, musica etc., toto in interlingua.

Le adresse directe de Radio Interlingua es http://www.interlingua.com/radio.