James M. Buchanan, premiato Nobel e associato distinguite del UMI, es extensemente presente in catalogo international de libros. Anque le ex-presidente del UMI, Leland B. Yeager, se trova inter le titulos.

  Un collection monumental de 20 volumines es le peso, per le qual contribue James M. Buchanan, premiato Nobel e associato distinguite del Union Mundial pro Interlingua, in le recente catalogo del casa editorial Liberty Fund.

James M. Buchanan, qui in 1986 recipeva le Premio Novel in scientias economic per le rege svedese Carl XVI Gustav, esseva in 1990 appunctate le prime associato distinguite del UMI - un titulo que plus tarde anque esseva date a professor e linguista André Martinet (1908-1999).

"The Collected Works of James M. Buchanan" (Le obras colligite de James M. Buchanan) include dece monographias e tote le importante articulos in jornales, presentationes e essayos del autor. Le presentation de illos plena un tote pagina in le catalogo primaveral/estive que ha justo apparite.

In illo on anque trova le libro "The Fluttering Veil" per Leland B. Yeager, presidente del UMI inter 1993 e 1999 e professor emerite de economia. Iste libro tracta disequilibrio monetari.

Lege plus:
Le direction del UMI - Associatos distinguite del UMI