Complete curso electronic e gratuite de interlingua in danese.

  Personas, qui parla o comprende danese, pote ora apprender interlingua per un complete curso gratuite in 15 lectiones pro comenciantes.

"Interlingua-kursus for begyndere" (Curso de interlingua pro comenciantes) es un curso con 15 lectiones breve que in total da un vocabulario de 750 parolas - assatis pro leger textos ordinari in interlingua. Durante le prime dece lectiones nos seque le familia Hansen, qui visita Scotia; il ha breve explicationes grammatic e parve exercitios pro omne lectiones. Le ultime cinque lectiones es un poco plus longe "Conversationes & textos" pro augmentar le vocabulario. In fin, il ha un exercitio de traduction, un sorta de "examine". Il ha vocabularios pro cata lection, un vocabulario total, un supervista del grammatica e un clave a omne le exercitios.

Le curso ha essite scribite per Thomas Breinstrup, redactor del magazin official del UMI, Panorama, e secretario del Union Danese pro Interlingua. Illo ha devenite un grande successo como curso de Internet e existe in norvegiano, anglese, germano, italiano e espaniol - con files audio MP3 pro plure del linguas.

Tote le material es in le formato PDF, assi que on pote leger lo in cata computator o imprimer lo sur papiro. Il es permittite usar le curso pro uso personal ma non distribuer o publicar lo.

Collige le curso ci:
Curso de interlingua pro comenciantes danese (Interlingua-kursus for begyndere)

Visita le section Dictionarios e cursos con multe materiales pro le studio in multe linguas