Le 1 de augusto essera le data pro le 14te Incontro Brasilian.

  Sabbato le 1 de augusto le 14te Incontro Brasilian de Interlingua habera loco.

Le Union Brasilian pro Interlingua (UBI) invita omne su membros al urbe Castanhal in le region est-amazonic pro un die intensive. On se incontra al Schola de Idiomas Yazigi in Av. Barão do Rio Branco-Bairro in le cento del urbe. Castanhal ha 158.000 habitantes e es situate circa 65 km est de Belém, le capital del Stato Pará. On pote attinger lo per autostrata in 50 minutas per auto o bus. A Belém existe volos diari pro tote altere urbes e capitales del pais.

Durante le incontro, le participantes va discuter le possibilitates pro diffunder le cognoscentia a interlingua e su uso practic ancora plus, pro conversar in interlingua e pro eliger le direction del UBI.

Le UBI publicara multe altere informationes multo tosto in su sito, www.interlingua.org.br e in su magazin electronic, Internovas.

Inscriptiones pro le 14te Incontro Brasilian de Interlingua debe esser inviate a Ramiro B. de Castro, redactor del magazin del UBI, Internovas, al adresse ramiro.castro@pa.trf1.gov.br.