Audi le prime interview in interlingua con parve Leo de duo annos in le nove emission de Radio Interlingua.

  Leo Frank ha solmente duo annos, ma ille ja comprende e parla interlingua.

In le 10me emission de Radio Interlingua su patre Sven Frank, le secretario general del Union Mundial pro Interlingua (UMI), face un mini-interview special con su filio. Ascolta lo mesme.

Radio Interlingua es un servicio gratuite del UMI. Illo recomenciava in augusto 2008 post quasi dece annos de pausa e presenta cata mense un nove programma con interviews, novas, musica etc. Toto es in interlingua, assi que on pote audir, como interlingua es un lingua in plen flor e multo vivente, gratias al multe voces qui participa in le labor.

Le 10me emission anque contine un interview con Martijn Dekker (Nederland), qui ha facite Google e Wikipedia parlar interlingua perfectemente. E le tresorero del UMI, Alberto Mardegan, lege un novella per Giovanni Boccaccio, traducite per ille mesme.

Redactor Péter Kovács como sempre liga tote le pecias inter se e presenta le programma que pote esser ascoltate directemente del adresse www.interlingua.com/radio o discargate in formato MP3, assi que on pote audir lo quando e ubi on lo vole.

Radio Interlingua ha in breve tempore devenite multo popular. Le prime emission ha essite discargate plus que 3.800 vices e essite ascoltate ancora quasi 1.000 vices directemente de Internet.

Omne le previe emissiones pote anque esser discargate o ascoltate directemente.

Lege anque:
 Interview con le historico (2009-03-02)
Jocos, musica e interview in Radio Interlingua (2009-02-14)
Milles ascolta Radio Interlingua (2009-01-24)
Nove programma de Radio Interlingua (2009-01-18)
Maestro de parolas in Radio Interlingua (2008-12-08)
Nove programma de Radio Interlingua (2008-11-07)
Nove emission de Radio Interlingua (2008-09-15)
Radio Interlingua retorna (2008-08-17)