Initiativa danese detra le nove Interforo que debe stimular le uso de interlingua pro scriber e discuter in interlingua directemente in Internet.

Un nove foro pro debattos super omne themas - ma sempre in interlingua - ha essite aperite in Internet, e il ha ja multe usatores.

Interforo al adresse www.interforo.org debe esser un foro plus moderne pro usar interlingua pro excambiar informationes e punctos de vista. Contrari al listas de discussiones, ubi le participantes recipe tote messages per e-posta, Interforo pote esser visitate e usate directemente in Internet, e tote le discussiones es arrangiate secundo themas, assi que on facilemente pote continuar un discussion - o initiar un nove.

"Foros web ha multe avantages, le plus importante essente le possibilitate de crear subforos secundo thema. In plus, il es multo facile registrar e connecter se con un tal foro, on pote modificar e mover le messages post que illos ha essite inviate, on pote insertar imagines in illos e on pote facer votationes, pro solmente mentionar alicun poc cosas. Un tal systema de foros es un modo de communicar multo plus dynamic que listas de e-posta, e il es mi sperantia que le sito potera contribuer a vivificar le communication electronic del interlinguistas," dice Lars Rosenmeier de Danmark, le initiator del Interforo.

Interforo aperiva le 21 de junio 2009. Le data esseva seligite simplemente, proque il non habeva un altere die special de interlingua vicin in le calendario, e alora Lars Rosenmeier seligeva le solstitio estive como apte!

Omnes pote leger le messages del sito, ma pro participar activemente on debe esser registrate, lo que es gratuite. On se registra per cliccar le button "Registration" (accessibile del frontispicio) e sequer le instructiones. Il dura solmente un momento.

Lars Rosenmeier debeva traducer tote le interfacie del sito in interlingua ante de lancear lo. Plure usatores de interlingua - Daniel Hollande, Martijn Dekker, Josu Lavin e Gerhard Hinze - ha adjutate in iste labor.

Lege anque:
 www.interforo.org