Apprende como usar interlingua e evitar errores. Le numerose breve consilios lingual del Panorama in interlingua es ora publicate - con retardo - ci in www.interlingua.com.

  Bon consilios de como usar interlingua correctemente es publicate in cata edition del magazin official del Union Mundial pro Interlingua, Panorama in interlingua. Ora un serie de iste bon consilios pote esser trovate ci in www.interlingua.com.

In le section Angulo linguistic, trovabile in le menu a sinistre, le breve consilios con multe exemplos illustrative es ora publicate. Le consilios es dividite secundo themas. Actualmente il ha themas super Errores grammatic, Un bon stilo, Le anno: saisones, menses e dies, Geographia, Numeros e cifras.

"Cata die on vide errores in textos in interlingua publicate in Internet e messages, e alcun personas anque parla interlingua con iste errores. Il pote esser difficile consultar sempre le grande grammaticas. Pro isto nos publica iste breve consilios e presenta multe exemplos de como usar parolas e expressiones in le maniera correcte. Sperabilemente on assi es inspirate a leger - e memorar! - los, assi que nos videra sempre plus de textos correcte que es un placer leger, e que da inspiration a explorar le enorme vocabulario de interlingua. In tal maniera, on aggrandi su proprie vocabulario e obtene un linguage plus ric," dice Thomas Breinstrup, redactor del Panorama in interlingua.

Le consilios esseva publicate in Panorama in interlingua in 2006 e 2007, ma le section essera actualisate de tempore in tempore con consilios de anque 2008. Le publication sempre essera in retardo, nam illos es primarimente scribite pro le lectores e abonatos del Panorama in interlingua.