Le campionato mundial de stenographia in Beijing in augusto va de novo usar interlingua pro su textos.

Per Thomas Breinstrup

  Quando expertos de stenographia de tote le mundo se assembla in le Centro Olympic Sportive in Beijing in augusto, illes debe laborar in interlingua.

Le Intersteno Congress 2009 essera le 15-21 de augusto 2009. Plus que 300 stenographos professional in le Federation International pro Tractamento de Information se ha annunciate pro le competition biennal que iste anno essera in China.

Le competitores lucta pro ganiar le campionato mundial de stenographia multilingual. Desde 1989, textos in interlingua ha essite parte del competitiones, post que le organisatores apprendeva del lingua, gratias al Societate Svedese pro Interlingua.

Le Societate Svedese pro Interlingua pote esser fer de esser probabilemente le sol organisation de interlingua que ha succedite haber un integre branca professional como membros. Durante le presidentia de Bertil Palmquist, omne stenographos del parlamento svedese, Riksdagen, esseva membros del SSI.

Le stenographos va iste anno usar textos del Bibliotheca electronic in interlingua, un servicio de e-libros gratuite del Union Mundial pro Interlingua (UMI) in www.interlingua.com. Anque textos de Panorama ha essite usate. Le stenographos debe prender lor stenogrammas e transcriber los in plen texto. Le resultato e correctitude es pois evalutate.

Le competitores gaude de "apprender un lingua que illes non debeva usar tempore pro apprender", como dice un del arrangiatores al Panorama.

Intersteno ha 23 paises de omne continentes como membros.

Illustration: Le Centro Olympic Sportive in Beijing forma le quadro del campionato mundial de stenographia. Illustration de www.intersteno.org