Grande interview super inseniamento de interlingua e le avantages de poter attinger 600 milliones de personas per le mesme lingua.

  »Interlingua augmenta le comprension,« dice le rubrica de un grande articulo in le jornal local Laholms Tidning in le west de Svedia.

Le articulo, publicate le 11 de septembre in le sito de Internet del jornal e le 12 de septembre in le jornal mesme, es un interview con Bengt Enqvist, professor gymnasial de linguas e vice-presidente del Societate Svedese pro Interlingua, super le curso de interlingua que ille ha arrangiate durante octo annos in Laholm.

»Il non ha multe cursos in Svedia. Le causa es que il es terribilemente difficile attinger le publico, ma le lingua totevia es colossalmente utile, pois que on pote esser comprendite per 600 milliones de homines,« dice Bengt Enqvist in le interview.

Le articulo describe como le grammatica pote esser sur duo paginas, e como le parolas es pronunciate precisemente como illos es orthographiate. Un poco de historia de interlingua es presentate, e il ha un parve vocabulario con parolas in interlingua. Anque Radio Interlingua es mentionate.

»Debe on poter apprender interlingua in le schola in Laholm?« demanda le jornalista, e Bengt Enqvist responde:

»Si, isto on debe, le alumnos apprenderea le lingua multo rapidemente. Essayos de inseniar le lingua ha essite facite inter alumnos qui studiava francese. In vice de comenciar directemente con le francese, un gruppo del alumnos habeva un curso de interlingua antea. Quando illes postea finiva in le schola, illes cognosceva equalmente multo de francese como le collegas, qui habeva apprendite francese durante tote le tempore in le schola.«

Le articulo pote esser legite (in svedese) in le sito de Laholms Tidning:
Interlingua ökar förståelsen