Un million cartas postal debe assecurar interlingua un record mundial - e omnes pote adjutar a obtener le resultato.

  Interlingua debe ganiar un record mundial, e omnes pote adjutar, assi que isto deveni le resultato.

Durante le 18ve Conferentia International de Interlingua in Kirchheimbolanden, Germania, le prime passo esseva prendite, quando le participantes durante un grande campania de information in le urbe Mainz distribueva brochures informative e un littera del secretario general del UMI, Sven Frank (photo), in interlingua e germano al personas, qui passava.

Un million cartas postal in 2014 debe esser realisate, e isto solmente pote occurrer, si usatores de interlingua in omne paises participa in le labor per traducer le message del secretario general in lor proprie lingua e distribuer e iste version e illo in interlingua a amicos, familia, collegas etc.

Le littera seque ci in basso. Bon successo con le labor pro ganiar le record mundial!

- - -

Record mundial del Union Mundial pro Interlingua

Car amico,

Durante le conferentia international pro Interlingua in Germania in le anno 2009, le Union Mundial pro Interlingua (UMI) prendeva le decision, de initiar un record mundial. Tu pote devenir un parte de iste record e supportar le communication inter le gente in tote le mundo.

Iste littera es scribite in interlingua – le lingua international que es comprensibile per milliones de gente in tote le mundo. Si tu pote comprender le contento, per favor invia un carta postal de tu urbe al adresse del secretario general del Union Mundial pro Interlingua:

Casa de Interlingua
Sven Frank
Hauptstr. 99
D-69469 Weinheim
Germania

Postea, per favor, face dece copias (o plus) del littera e invia los con un littera personal a personas de qui tu es secur, que illes comprendera le contento tamben. Le scopo es reciper al minus un million de cartas postal usque 2014.

Io te regratia pro le supporto e te invia

mi optime salutes

Sven Frank
secretario general del UMI
www.interlingua.com