Secretario general: Multe activitates a expectar

Le secretario general del UMI parla in Radio Interlingua super activitates futur.

UMI Le conferentia international de interlingua in Germania in le estate 2009 esseva solmente le initio de un grande serie de activitates a venir pro promover interlingua e le uso practic de illo in tote le mundo.

Assi explica le secretario general del Union Mundial pro Interlingua (UMI), Sven Frank, in le secunde parte de un grande interview con Radio Interlingua. Le redactor Péter Kovács le interviewa al ultime die del conferentia, e ille explica super le resultatos del conferentia e - ante toto - super le planos pro le futuro.

Numerose activitates es sub planification, i.a. incontros in Germania, in Francia e in le Peninsula Iberic, como anque le incontros nordic de interlingua, que ha existite desde 1988, continua in 2010.

Radio Interlingua es un servicio gratuite del UMI. Illo recomenciava in augusto 2008 post quasi dece annos de pausa e presenta cata mense un nove programma con interviews, novas, musica etc. Toto es in interlingua, assi que on pote audir, como interlingua es un lingua in plen flor e multo vivente, gratias al multe voces qui participa in le labor.

Tote le usque ora 15 programmas de Radio Interlingua pote esser ascoltate directemente del adresse www.interlingua.com/radio o discargate in formato MP3, assi que on pote audir lo quando e ubi on lo vole.

Le radio ha devenite immensemente popular con milles de ascoltatores.